Sa malayo palang ay makikita mo agad ang malaking usok na nagmamayabang sa gitna ng kalawakan ng syudad. Ang ingay ng mga sirena ng mga bumbero ang magsasabi sa iyo na may hindi magandang nangyari.

Sa isang sulok ng paligid ng nagbabagang gusali na syang sentro ngayon ng atensyon ng mga bumbero, mga biktima, mga usyusero, at mga mystery-enthusiast ay makikita si Daisy na tulalang nakatingin sa malaking usok habang unti-unting humihina ang kanyang pagkaka-kapit sa form–7A ng BNP na syang kailangan na form para sa pagpapapalit ng pangalan.

At ayun nga! Halos lahat ng bahagi ng BNP ay natupok ng apoy. Ayon sa mga eksperto, aabot pa ng limang taon ang rehabilitasyon ng ahensya bago tuluyan itong magsapubliko muli. Pwera na lang kung may isang trillionaire na handang magpondo sa rehabilitasyon. Ang reyalisasyong ito ang lalong nagpahina sa kapit ni Daisy sa kanyang form–7A hanggang sa tuluyan itong liparin sa kalangitan at maging bahagi ng kaguluhan sa paligid. 

Nakatulalang napaupo si Daisy sa isang kalapit na bench. Sakto naman na nagpapatugtog ang katabi nyang nakakaisyuso ng kantang “Impossible Dream”. Ito ang tuluyang nag-set ng ambiance sa paligid. Kasabay pa ng pagihip ng malungkot na hangin at paglipad ng mga upos ng nasusunog na gusali, ay sumariwa kay Daisy ang pitong taon nyang pagpupunyagi para lang mapapalitan ang kanyang pangalan. Kasabay nito’y tinanong nya sa kanyang sarili: “Bakit nga ba gigil na gigil ako na palitan ang aking pangalan?”